ଅଳସୁଆ ବିଲବଡ଼ାତାଦି ଗପ.pdf
୨. ଗୁଗୁରି ଆଉ ତାରା
ରଣ୍ତେଦିନା ତାରା ତିଙ୍ଗି ଉଙ୍ଗିତିକି ଜାଡ଼୍ତା କଜଗିନିଦିଆତା ଏ଼ଦାଡ଼ିତି ବୂତୁ ଇସ୍କି ଗିତେ। ଏ଼ଦି ଇସ୍କିତା ଈଜୁ କଜଗିକି ଲାଗାତେ। ଏ଼ଦି ଈଜୁ କଜଗି କଜଗି ରୁଣ୍ତି ଗାଡିତା ପ଼ଞ୍ଚିଆତେ। ଆଉ ଗାଡିତି ହୁଡ଼ାନା ଈଜୁ ଉଙ୍ଗି ହାଚେ। ଏ ଗାଡିତା ଈଜୁ ଉଙ୍ଗିତିକି ହାନି ଦିଆତା ଏ଼ଦାଡ଼ିତାଦି ଗଡା କସି ଆଇତେ ଆଉ ଏ଼ଦି ଗାଡିତା ବା଼ସି ଆକି ଲାଗାତେ। ଏ଼ଦି ବ଼ଞ୍ଚାଗିଆ ବ଼ଞ୍ଚାଗିଆ ନା଼ନୁ ଈଜୁତା ବୁଡେଇତେଇଁ ଏଙ୍ଗେ ଇଞ୍ଜେସେ ବୂତୁ କାଉଳି ଆକିଲାଗାତେ। ଏ ଗାଡି ତଡ଼ ରୁଣ୍ତି ମାଡ଼ି ମାଚେ ଏ ମାଡ଼ିତା ରୁଣ୍ତି ଗୁଗୁରି ବଣ ଗିଆନା ରଜେଇଚେ। ଏ଼ଦି ତାରାତାଦା କାଉଳି ଆନାଦା ସବଦ ବେଞ୍ଜାନା ଏ ମାଡ଼ିତାଦା ରଣ୍ଡା ଆ଼କୁ ତ଼ଣ୍ଟଡ଼େ ଏଚାନା ତାରା ଆଗୁସି ତ୍ରୁକୁତେ ଆଉ ଏ ତାରାତି ବିଚୁତେ, “ଇ ଆ଼କୁତା ଏ଼ଙ୍ଗା ଆଉ ଏ଼ଦି ବୂତୁ କସ୍ଟତା ଈଙ୍ଗିତେ।” ତାପରେ ଏ଼ଦି ଏ ଗାଡି ତଡ଼ ବାସିଆଇସେ ବାତେ, ଆଉ ଏଚେ ସମେ ପରେ ତାରା ବାରି ନ଼ତେ।
ତାପରେ ଗୁଗୁରିତି ଦନ୍ୟବାଦ ହିତେ ଆଉ ଏ ଦିନାଟେ ଏ଼ବି ରିଆସ ସାଙ୍ଗ ଆ଼ନା ରେଜାତୁ। ଏଚେଦିନାପରେ ଏ ଜାଡ଼୍ତା ରୁଆଞ୍ଜୁ ବାଣୁଆ ବେ଼ଣ୍ଟା ଗିକିତିକି ବାତାଞ୍ଜୁ। ବାଣୁଆଁ ହୁଡ଼ିତାଞ୍ଜୁ ଜେ ଗୁଗୁରି ମାଡ଼୍ତା କକାନେ, ଏଞ୍ଜୁ ଏ ଗୁଗୁରିତି ହା଼ପାକି ତିକି ଚେସ୍ଟା ଗିତାଞ୍ଜୁ। ତାପରେ ତାରା ହୁଡ଼ିତେ ଜେ ତା ସାଙ୍ଗତାଦି ଜିବନ ଅସୁବିଦାତା ମାନେ। ଏଙ୍ଗେତିକି ଏ଼ଦି ବା଼ନା ବାଣୁଆଁତାଦା ଗଡାତି ହ଼କେଇତେ। ତାରା ମୁଡ଼ିଗିନାଦା ହୁଡ଼ାନା ଏ଼ଞ୍ଜୁ ଗାଡ଼େଇତାଞ୍ଜୁ ଆଉ ଏ ଜା଼ଗା ପିଆନା ଡୀବିତାଞ୍ଜୁ। ତାପରେ ଏ ଗୁଗୁରି ବା଼ନା ତାରାତି ଦନ୍ୟବାଦ ହିତେ। ଏ଼ବି ରିଆସ ବୂତୁ କୁସିତା ରେଜାତୁ।
୩. ଟୁପି ପାର୍ପିନି ଲୂକୁ ଆଉ ମାକିଡ଼ିକା
ରଣ୍ଡେ ନା଼ଟା ସତ୍ରୁଗନ ପଦାତା ରୁଆଞ୍ଜୁ ଲୂକୁ ମାଚାଞ୍ଜୁ। ଏଞ୍ଜୁ ଟୁପିଙ୍ଗା ପାରାନା ତାପରିବାରତି ଚଳି ଗୀଚାଞ୍ଜୁ। ରଦିନା ନା଼ଜୁଙ୍ଗାଣ୍ଡା ବୁଲୁବୁଲି ଟୁପିଙ୍ଗା ପାର୍ପିଚାଞ୍ଜୁ। ପାର୍ପିନିଦିଆତା ଏ଼ଞ୍ଜୁତି ବୂତୁ ହାକି ଗିତେ, ଆଉ ଏଞ୍ଜୁ ରଣ୍ଡେ ବଡ଼ାମାଡ଼ି ନେ଼ତା ହାଜାନା ଜିଣ୍ଡୁ ଉଟାଞ୍ଜୁ। ଜିଣ୍ଡୁ ଉନିପରେ ଏଦିମ୍ବା କୁକୁତାଞ୍ଜୁ, କୁକୁନିଦିଆତା କୁଲୁକୁଲୁ ପବନ ଗିତିଗଣେ ଏ ମାଡ଼ି ନେ଼ତା ହୁଞ୍ଜେଇତାଞ୍ଜୁ।
ରଗଣ୍ଟା ପରେ ନିଙ୍ଗାନା ହୁଡ଼ିତାଞ୍ଜୁଜେ ତାଇ ଟୁପିଙ୍ଗା ହାଲାବା ଏ଼ଙ୍ଗେତିକି ଏ଼ଞ୍ଜୁ ଚାନିଆଁ ଆ଼ନା ବିଚୁତାଞ୍ଜୁ, “ନା଼ଡ଼ି ଟୁପିଙ୍ଗା ଏମ୍ବେ ଡେଏସିଗିତେ।” ହାବୁ ମଙ୍ଗଲ ଚିନ୍ଦାରା ଆତାଞ୍ଜୁ, ହେଲେ ଏଦିମ୍ବା ଏମ୍ବେରିତିସେ ହୁଡ଼ାତାଞ୍ଜେ। ଏ ତକଣେ ଏ଼ଞ୍ଜୁ ମାଡ଼ି କୁଇଟି ମାକିଡ଼ିଙ୍ଗାଣ୍ଡି ହୁଡ଼ିତାଞ୍ଜୁ ଆଉ ଏ଼ବିହାବେ ଏଞ୍ଜୁତାଡ଼ି ଟୁପିଙ୍ଗାଣ୍ଡି ଉଆନା ତାଲତା ଚୁଜାଚୁ। ଏଚେ ଚେସ୍ଟା ଗିତାଞ୍ଜୁ ଏ ମାକିଡ଼ିକାଟେ ଟୁପିଙ୍ଗା ହାଚିଆକି, ହେଲେ ହାଚାମୁଆତାଞ୍ଜେ। ସେସତା ଏ଼ଞ୍ଜୁ ବାବି ଆତାଞ୍ଜୁ ଇନିସି ଗିପାଲେ ନା଼ନୁ ଇବାଡ଼ିଟାଣାଟେ ଟୁପିଙ୍ଗା ହାଚେଇଁ।
ତାପରେ ଏ଼ଞ୍ଜୁ ତା଼ନୁ ଚୁଜାନି ଟୁପିତି ଦୂରୁ ଗିଆନା ପବୁଡ଼ି ଗେଇତାଞ୍ଜୁ। ଈଦା ହୁଡ଼ାନା ଏ଼ବିସେ ଟୁପିଙ୍ଗା ପବୁଡ଼ି ଗେଇତୁ। ତାପରେ ଏ଼ଞ୍ଜୁ ଏ ଟୁପିଙ୍ଗାଣ୍ଡି ଗୁଟି ଗିଆନା ହାଚିଆତାଞ୍ଜୁ ଆଉ ଏ଼ବାଡ଼ି ପା଼ଣ୍ଡାନା ବୂତୁ କୁସି ଆତାଞ୍ଜୁ ଆଉ ତାଇଜିଆ ହାଚାଞ୍ଜୁ।
୪. ବଉଳା ଗାଈ
ରୁଣ୍ଡି ନା଼ଜୁତା ବଉଳି ପଦାତା ରୁଣ୍ଡି ଗାଈ ମାଚେ। ଏ଼ଦାଡ଼ି ତିକି ରୁଣ୍ଡି ତା଼ମାଙ୍ଗା ମାଚେ। ତା଼ମାଙ୍ଗାଣ୍ଡି ଏ଼ଦି ବୂତୁ ସରଦା ଆଇଚେ ଆଉ ଏ଼ଦି ହାବୁଦିନା ତିଙ୍ଗିଉଙ୍ଗି ହାନି ଦିଆତା ତା଼ମାଙ୍ଗାଣ୍ଡି ପା଼ଲୁ ଉଟାନା ଜାଡ଼୍ତା ହାଜିଚେ। ଏ଼ଙ୍ଗେନେ ହାବୁଦିନି ଚିଞ୍ଜାନା ମିଲିଙ୍ଗି ଦିଆତା ବା଼ନା ତା ଡୁଡ଼ି ଡ଼େଚ ବଲତା ରେଜେଇଚେ। ଇଙ୍ଗେନେ ରୁଣ୍ଡିଦିନି ବଉଳି ଗାଈ ତା ଡୁଡ଼ିତି ପା଼ଲୁ ଉଟାନା ତିଙ୍ଗି ହାଚେ ଚିଞ୍ଜି ଚିଞ୍ଜି ବେରେ ଜାଡ଼୍ତା ଡୀବିତେ ଆଉ ଏ ଜାଡ଼୍ତା ରୁଣ୍ଡି କାଡ଼୍ନି ମାଚେ। ଏ଼ଦାଡ଼ି ହାବୁଡ଼ା ବଉଳି ଗାଈ ବେଣ୍ଡେଇତେ। କାଡ଼୍ନି ଏ ଗାଈତି ବିଚୁତେ, ‘ନା଼ନୁ ନୀଙ୍ଗି ଚିଞ୍ଜେଇ।” ବଉଳି ଗାଇ କାଡ଼୍ନିତି ବିଚୁତେ, “ନୀନୁ ନା଼ଙ୍ଗି ଚିଞ୍ଜାଦି ସତ, ହେଲେ ନା଼ମାଙ୍ଗା ରୁଣ୍ଡି ମାନେ ଏ଼ଦାଡ଼ିତି ନା଼ନୁ ପା଼ଲୁ ଊଟାନା ବାଇଁ ତାପରେ ନା଼ଙ୍ଗି ନୀନୁ ଚିଞ୍ଜାଦି।” ହେଲେ କାଡ଼୍ନି ଗାଈତି ବିଚୁତେ, “ନୀନୁ ନା଼ଙ୍ଗି ଟକି ଗେ଼ବେଇଞ୍ଜି, ନୀନୁ ହାବାଲେ ଆଉ ବା଼ବାଦେ ହେଲେ ଗାଈ ଗେଗାଲା ହିଆନା ବିଚୁତେ, ‘ଦିଆ ନା଼ମାଙ୍ଗାତାଦି ପା଼ଲୁ ଉନି ସମେ ନା଼ନୁ ନା଼ମାଙ୍ଗାଣ୍ଡି ପା଼ଲୁ ଊଟୁକି ହାଇଁ।
ତାପରେ ତା଼ ଲାଇସି ନା଼ନୁ ନା଼ମାଙ୍ଗାଣ୍ଡି ପା଼ଲୁ ଊଟାନା ନି ରେକିଟି ବାପାଲେ ନୀନୁ ନା଼ଙ୍ଗି ଚିଞ୍ଜାଦି। ଏ଼ଦା ଇଚିଗଣେ କାଡ଼୍ନି ବଉଳି ଗାଈତି ପେଇତେ। ଆଉ ଗାଈ ତା଼ମାଙ୍ଗା ରେକିଟି ହାଚେ, ଏ ରାତିନେ ତା଼ମାଙ୍ଗାଣ୍ଡି ପା଼ଲୁ ଊଟାନା ବିଚୁତେ, “ନୀନୁ ନୀଞ୍ଜୁଟେ ହାବୁ ଲୁକୁଡ଼େ ମୀସାନା ରେଜାଦି ଆଉ ଏମ୍ବେରେ ଡ଼େଚ ମାଡଗୁଳ ଆ଼ବା।” ତାପରେ ଗାଈ ସକାଳୁ ଆତିଗଣେ ତାଡୁଡ଼ିତି ପା଼ଲୁ ଊଟାନା କାଡ଼୍ନି ରେକିଟି ହାଚେ ଆଉ ନା଼ଙ୍ଗି ଦିଆ ଚିଞ୍ଜାମୂଦି ଇଞ୍ଜାନା ବିଚୁତେ। ଏଦିମ୍ବାଟେ କାଡ଼୍ନି ଗାଈତାଦା ପର୍ତତି ହୁଡ଼ାନା ଗାଈତି ପେଇତେ ଆଉ ବିଚୁତେ, ‘ହାଲୁ ନା଼ନୁ ନୀଙ୍ଗି ପିଉଦାତେଇଁ ନୀନୁ ନୀମାଙ୍ଗା ଡ଼େଚ ବଲତା ରେଜା । ତାପରେ ବଉଳି ଗାଈ ମନ କୁସିତା ହାଜାନା ତା଼ମାଙ୍ଗା ଡ଼େଚ ରେଜାତେ।
୫. ଜଡ଼ାକା ହଂସଙ୍ଗା ଆଉ ରୁଣ୍ଡି କୁଞ୍ଚେଇତାଦି ଗପ
ରଣ୍ଡେ ନା଼ଟା ରୁଣ୍ଡି ବେରେ ବାନ୍ଦା ମାଚେ। ଏ ବାନ୍ଦାତା ବୂତୁ ମୀନାଙ୍ଗା, ବେଙ୍ଗଇକା, ଜା଼ନାଙ୍ଗା, ରାସ୍କା ଆଉ କୁଞ୍ଚେଇକା ରେଜେଇଚୁ। ହେଲେ ଏ ବାନ୍ଦାତା ହାବୁଦିନା ଜଡ଼ାକା ହଂସଙ୍ଗା ମୀନାଙ୍ଗା ତିଙ୍ଗିତିକି ବାଇଚୁ, ଏଚେଦିନାପରେ ଏ଼ବି ରୁଣ୍ଡି କୁଞ୍ଚେଇ ଡ଼େଚ ସଙ୍ଗାତ ଗିତୁ। ଈଙ୍ଗେ ଏଚେଦିନା ହାନିପରେ ଏ ବାନ୍ଦାତି ଈଜୁ ବାଚାକି ଲାଗାତୁ, ଆଉ ଏ ଜଡ଼ାକା ହଂସଙ୍ଗା ଚିନ୍ତା ଗିତୁ ଜେ ମା଼ରୁସିନା ଉଡାନାକାଲ ଆ଼ରୁଣ୍ଡି ବାନ୍ଦାତା ଡୀବିନା ହେଲେ ମା ସାଙ୍ଗତ ବା଼ମୁଆଦେ। ଏ଼ଦି ଇଦିମ୍ବା ରେଜାପାଲେ ହାଇନେ ଏଙ୍ଗେତିକି ଏ଼ଦାଡ଼ିତି ମା଼ ଡ଼େଗେ ଡେଏସିଗିନା ଇଞ୍ଜାନା ଚିନ୍ତା ଗିତୁ।
ତାପରେ ରଣ୍ଡା ଉପାୟ ପା଼ଟୁ ଆଉ ହାଜାନା ରଣ୍ଡା ବାଡି ହାଚିଆତୁ। ଆଉ ଏ ଜଡ଼ାକା ହଂସଙ୍ଗା ବାଡି ରୀକଡ଼ ନିଜ ତ଼ଣ୍ଟଙ୍ଗାଡ଼େ ହ଼କାନା ଆସୁତୁ ଆଉ ତା ସାଙ୍ଗ କୁଞ୍ଚେଇତି ମୁଜୁରି ହ଼କାନା ଆସୁକିତିକି ବିଚୁତୁ। ତାପରେ ଆ଼ରୁଣ୍ଡି ବାନ୍ଦାତା ଆସାନା ଡୀବିତୁ ଆଉ ଏ଼ବି ଏଦିମ୍ବା ବୂତୁ କୁସିତା ରେଜାତୁ।
